Кася Камоцкая.
Мне падабаецца Кася Камоцкая.
Прывабная жанчына
З сумнымі вачыма.
Мне падабаецца Кася Камоцкая
Як прывабная жанчына
З сумнымі вачыма,
Якіх я ніколі ня бачыў.
Голас.
Самотны сіпаты голас.
Мяне непакоіць голас
Спадарыні Касі Камоцкай,
Таму што ён вельмі прыгожы,
Бо гэта пытаньне густаў,
Да таго ж мне падабаецца
Самотны сіпаты голас
Прывабнай жанчыны
Спадарыні Касі Камоцкай.
І песьні.
Я вельмі люблю песьні.
У песьнях гучыць адзінота.
А часам, калі сьпявае
Спадарыня Кася Камоцкая,
У тых песьнях гучыць адзінота.
Мне падабаюцца песьні,
Якія сьпявае Кася
Самотным сіпатым голасам.
І словы.
Лянівыя добрыя вершы,
Калі іх уважліва слухаць.
Нічога ня вартыя песьні,
Якія сьпявае Кася,
Бязь вершаў, якія складае
Прывабнай таемнай жанчыне
Спадар Міхал Анемпадыстаў.
