Нарадзілася ў Руане, рана страціла маці. Працавала гувернанткай, пісала школьныя падручнікі. У эпоху Асветніцтва распрацаваная ёй сістэма выхавання карысталася вялікай папулярнасцю. Першы раз выйшла замуж няўдала і развялася праз два гады, пакінуўшы прозвішча мужа. У 1746 годзе з’ехала ў Англію, дзе таксама працавала гувернанткай. Там выйшла замуж другі раз і нарадзіла шасцёра дзяцей. Пражыўшы ў Англіі 17 гадоў, Лепрэнс дэ Бамон пакінула краіну і рэшту жыцця правяла ў Савоі.
Першы апублікаваны твор пісьменніцы — дыдактычны раман “Трыюмф праўды” (Le Triomphe de la vérité, 1748). Найбольшую вядомасць Лепрэнс дэ Бамон прынеслі яе казкі, сярод якіх самая знакамітая — апрацоўка “Прыгажуні і Пачвары” (La Belle et la Bête, 1757).
Упершыню казка, што асноўнымі сюжэтнымі лініямі нагадвае “Прыгажуню і Пачвару”, з’явілася ў зборніку італьянскага пісьменніка Джавані Франчэска Страпаролы “Прыемныя ночы”. Першае французскае выданне казкі ажыццявіла Габрыэль-Сюзана Барбот дэ Вільнёў у 1740 годзе. Лепрэнс дэ Бамон моцна перапрацавала казку, і яе варыянт зрабіўся вядомы ва ўсім свеце. Казка неаднакроць экранізавалася (адна з самых вядомых экранізацыяў — фільм Жана Както з той самай назвай), паводле яе ставіліся балеты і мюзіклы, ствараліся мультфільмы. Рускамоўным чытачам сюжэт з дзяцінства вядомы па версіі С. Аксакава пад назвай “Пунсовая кветачка”.
