Нарадзілася ў 1984 годзе ў Гародні. Выпускніца філалагічнага факультэта БДУ (беларуская філалогія), кандыдат філалагічных навук (2018). Аўтарка кнігі для дзяцей “Кот Шпрот і таямніца атракцыёнаў” (2018). Перакладае з ангельскай, польскай і іншых моў.
На беларускую мову пераклала раманы “Пыха і перадузятасць” Джэйн Остэн (2019) і “Не адпускай мяне” Кадзуа Ісігура (2019), аповесці “Калядны харал” Чарлза Дыкенса (2014), “Замак Отранта” Хораса Уолпала (2016) і “Знак чатырох” Артура Конана Дойла (2017), зборнік апавяданняў “Следства вядзе суддзя Дзі” Роберта ван Гуліка (2019). Адна з перакладчыц раманаў “Знахар” Тадэвуша Далэнгі-Мастовіча (2016) і “Надбярэзінцы” Фларыяна Чарнышэвіча (2017). Паэтычныя пераклады друкаваліся ў зборніках вершаў з серыі “Паэты планеты” (У. Шэкспір, Г. Апалінэр, Э. По. Дж. Кітс. Б. Лесьмян, У. Б. Ейтс, Э. Сёдэргран), у зборніках вершаў Ч. Мілаша “Выратаванне” і В. Шымборскай “Канец і пачатак”, празаічныя – у зборніку твораў Э. По “Маска Чырвонае Смерці”, зборніку дэтэктыўных апавяданняў “Злачынства, сэр!” і містычных апавяданняў “Вусцішны пакой”, у зборніках апавяданняў “Прыгоды Шэрлака Холмса” і “Нататкі пра Шэрлака Холмса” А. К. Дойла. Шэраг перакладаў друкаваўся ў часопісе "ПрайдзіСвет", "Дзеяслоў", "ARCHE", газеце "Літаратурная Беларусь".
Лаўрэатка прэміі часопіса “ПрайдзіСвет” у намінацыі “Публікацыя ў часопісе “ПрайдзіСвет” за 2009 год і прэміі “Дэбют” імя М. Багдановіча за 2013 год у намінацыі “Пераклад”.
