6–2003
» да Зьместу «

Эўропа на ўсход ад Эўропы
аналітыка • эсэістыка • крытыка • рэцэнзіі

лірыка

Аляксей Бацюкоў
Міты поўначы Магілева

---

За вакзалам жыла вялікая сям’я, у жонкі было дрэннае вока. Вяртаючыся дамоў, муж шторазу наракаў на яе абы за што і некалькі разоў біў. Аднойчы жонка вынула сваё дрэннае вока і на яго месца паставіла добрае вока свайго старэйшага сына. Гэтым вечарам муж не чапаў яе і мірна лёг спаць. Наступным днём яна ўзяла вока сваёй дачкі і муж, не заўважыўшы падмены, добра паставіўся да жанчыны. Трэцім днём яна памянялася вокам з малодшым сынам, але той таемна падклаў дрэннае вока ў талерку бацькі. Пабачыўшы яго, мужчына зразумеў, што дарэмна біў жонку.
 

Сой-Сой — маленькі хлопчык з вуліцы Кірава — выкупаўся ў кар’еры, але пакінуў на пяску свой мокры сьлед. Суседзкі кот сеў у гэты сьлед, ператварыўся ў Сой-Соя і прыйшоў да яго дамоў. Маці заўважыла, што хлопчык худзее і чарнее, а праз скуру яго прабіваецца густая поўсьць, і пачала націраць яго настоем дубу. Але несапраўдны Сой-Сой пачарнеў яшчэ больш і выпусьціў з-пад вопраткі свой хвост. Маці здагадалася, хто перад ёй, паклаўшы на галаву жывёлы зялёны лісток — на твары адразу вырасьлі вусы. Яна сказала: “І дзіця маё хворае, але маніёкі трэба перш налупіць”. Кот схапіў яе за руку і закрычаў: “Я хачу маніёкі. Пакармі мяне, а іначай увап’юся ў тваю скуру кіпцюрамі”. Аднак маці адсекла нажом яму хвост, і кот ледзьве ўцёк у расчыненыя дзьверы. Хвост ператварыўся ў рой мух, яны ўсе сталі лётаць па пакоях і загінулі толькі пад зіму.
 

Мужчына ішоў уздоўж будоўлі і кашлянуў. Лайдак, які ішоў побач, перахапіў гэты кашаль, так што мужчына хутка пачаў задыхацца і памёр, а яго цела зацьвіло.

Адзін чалавек па плячо ўклаў руку ў воды Дняпра. Раптам плыня зьнесла руку, а чалавек застаўся на беразе.
 

Адзін міліцыянт сасьніў, што на вялікай паляне бандыт закапаў шмат грошай. Ён прачнуўся і закрычаў жонцы:

— Жонка, рыхтуйся мяне сустракаць. Зараз я вярнуся дамоў багатым.

Міліцыянт апрануў сваю форму і пабег на паляну. Там ён пачаў капаць зямлю, выкапаў нямецкую бомбу і ўзарваўся. Бандыт сядзеў у хмызах і доўга рагатаў.
 

Вядома, што старыя жанчыны часам палююць на малых дзетак, асабліва калі пачынаюцца халады. Ужываць дзетак ім бывае неабходна, каб набрацца сілаў да наступнага лета. Так, адна бабулька стаілася блізу дзіцячага садка і ўжо была выскачыла з свайго сховішча, каб скрасьці самотную дзяўчынку на ўскрайку пляцоўкі, як раптам наляцелі груганы і задзяўблі бабульку.
 

Другі міліцыянт сабраўся лавіць рыбу. Ён сядзеў з вудай на беразе і сьпяваў вясёлую песеньку: “Ум-ла-ла-ла! Ум-ла-ла-ла! Мае доўгія валасы і тоўстыя ногі падабаюцца жанчынам!” Тут з вады паказалася голая прыгожая дзяўчына. Яна паклікала міліцыянта да сябе. Той адклаў вуду, зайшоў у раку і абняў дзяўчыну, надумляючы, дзе зь ёю легчы. Аднак яна моцна схапіла яго рукамі і ледзьве не зацягнула за сабой на дно. Міліцыянт вырваўся, толькі рыбіна луска засталася на яго вопратцы, пераліваючыся белым, шэрым і чорным колерамі. З таго часу міліцыянты на поўначы Магілева ходзяць у плямістай форме.