Алесь Пісьмянкоў
Якаў Палачанін

---

…мужествовав крепко.
З Наўгародзкага першага летапісу

«Мужествовав крепко» -
Колькі ў гэтым сказе!
«Мужествовав крепко» -
Хіба лепей скажаш?
…Чуеш,
як па лёдзе
Капыты малоцяць?
Бачыш, той вунь,
сьмелы,
Зь сінімі вачыма,
Родам з Русі Белай,
Якаў.
Палачанін.
У баях,
на ловах,
Як мядзьведзь,
ён дужы,
На пірах князёвых
Не гаворыць дужа.
Па крывавым лёдзе
Капыты малоцяць.
На гарачым лёдзе
Сьмерч мячоў і дзідаў…
Колькі не народзяць
Хлопцаў маладзіцы!
Летапісец рупны -
Сьведка дзён крывавых.
…Летапісцы скупа
Раздавалі славу.

1987

←вярнуцца ў Анталёгію